GAZA — Një sulm ajror izraelit ka shkaktuar vdekjen e tre personave, mes të cilëve edhe një vajzë 7-vjeçare, gjatë një goditjeje në zonën Al-Mawasi, në perëndim të qytetit Khan Yunis.

Sipas autoriteteve mjekësore dhe Mbrojtjes Civile në Gaza, bombardimi në zonën ku strehohen mijëra familje të zhvendosura ka lënë gjithashtu të plagosur disa persona të tjerë, përfshirë gra dhe fëmijë. Zëdhënësi i Mbrojtjes Civile, Mahmoud Bashal, konfirmoi se ekipet e shpëtimit kanë nxjerrë trupat e pajetë nga rrënojat, ndërsa spitali Nasser në Khan Yunis pranoi viktimat dhe të lënduarit.

“Vetëm gjatë 24 orëve të fundit, 11 persona kanë humbur jetën dhe më shumë se 50 të tjerë janë plagosur nga sulmet ajrore dhe të shtënat izraelite në të gjithë enklavën”, bën me dije Mbrojtja Civile në Gaza.

Tensionet janë përshkallëzuar paralelisht edhe në pjesën qendrore të Rripit të Gazës, ku mjete të blinduara dhe buldozerë ushtarakë kanë depërtuar në lindje të Deir al-Balah, duke kaluar vijën e kontrollit ushtarak. Incidentet vijnë pavarësisht marrëveshjes së armëpushimit të arritur në tetor të vitit të kaluar, pas luftës së nisur në tetor 2023.