TIRANË — Policia e Tiranës ka zbuluar një tjetër ambient ku mbaheshin lëndë piroteknike të kontrabanduara, të cilat dyshohet se u shiteshin personave të përfshirë në aktet e dhunshme gjatë protestave në kryeqytet.

Në kuadër të këtij operacioni, forcat e rendit kanë prangosur një 32-vjeçar, në banesën e të cilit në rrugën “Zela” u gjetën dhe u sekuestruan në cilësinë e provës materiale 47 pako me fishekzjarre. Verifikimet e kryera treguan se i riu nuk dispononte licencën përkatëse për tregtimin e këtyre produkteve dhe as faturat e blerjes së tyre.

Sipas hetimeve paraprake, dyshohet se 32-vjeçari u ka shitur lëndë piroteknike personave të maskuar që morën pjesë në tubimin e së shtunës, me qëllim përdorimin e tyre kundër forcave të rendit dhe godinave institucionale. Hetimet po vijojnë për dokumentimin e plotë të kësaj veprimtarie dhe identifikimin e personave të tjerë të implikuar.