TIRANË — Ka përfunduar pas gati një ore mbledhja me dyer të mbyllura e Grupit Parlamentar të Partisë Socialiste, e zhvilluar në ambientet e Kryesisë së Kuvendit me pjesëmarrjen e kryeministrit Edi Rama.

Pas përmbylljes së takimit që nisi në orën 10:00, eskorta e kreut të qeverisë është larguar nga vendngjarja. Në fokus të diskutimeve ishte përcaktimi i axhendës parlamentare për seancën e ardhshme plenare, si dhe nismat më të fundit ligjore të paralajmëruara nga ekzekutivi.

Gjatë mbledhjes, kryeministri Rama u ka prezantuar deputetëve të mazhorancës paketën e masave të bërë publike një ditë më parë, e cila ndërlidhet drejtpërdrejt me menaxhimin e situatës dhe veprimet gjatë protestave të zhvilluara në kryeqytet.