Roskovec/ Të shtëna me armë para banesës së ish-bashkëjetueses, 37-vjeçari përfundon në pranga

Të shtënat me armë zjarri në fshatin Luar të Roskovecit kanë vënë në lëvizje Policinë, ndërsa në qendër të ngjarjes dyshohet se është një 37-vjeçar, i cili ka qëlluar me armë para banesës ku jetonte ish-bashkëjetuesja e tij.

Ngjarja është regjistruar në rrethana që tashmë janë nën hetim, ndërsa sipas Policisë, të shtënat dyshohet se kanë ardhur për motive të dobëta.

Fakti që ato kanë ndodhur përpara banesës së ish-bashkëjetueses e bën edhe më shqetësues kontekstin e ngjarjes, veçanërisht për shkak të dyshimeve për dhunë në familje dhe mosrespektim të një vendimi gjykate.

Pas njoftimit për të shtënat, shërbimet e Policisë Roskovec, në bashkëpunim me Komisariatin e Policisë Fier, nisën veprimet për zbardhjen e rrethanave dhe identifikimin e personit të përfshirë.

Në përfundim të veprimeve, u bë arrestimi i 37-vjeçarit Besmir Rustaj, banues në Roskovec.

Ndaj tij, materialet i janë referuar Prokurorisë për veprat penale të mbajtjes pa leje të armëve dhe municionit, dhunës në familje dhe veprimeve në kundërshtim me vendimin e gjykatës.

Hetimet pritet të hedhin më shumë dritë mbi rrethanat e ngjarjes dhe atë që ka ndodhur përpara banesës së ish-bashkëjetueses. /noa.al