Rusia rekruton për luftë edhe të sëmurë e borxhlinj, media zbulon dëshmi tronditëse

Rusia po përdor gjithnjë e më shumë presionin dhe mashtrimin për të rekrutuar ushtarë që do të dërgohen në luftën në Ukrainë. Sipas një investigimi të CNN amerikan që citon noa.al, mes personave që dyshohet se detyrohen të nënshkruajnë kontrata ushtarake janë burra me probleme të rënda shëndetësore, persona të varur nga alkooli dhe qytetarë të zhytur në borxhe.

Kjo praktikë, e cilësuar nga disa ekspertë si “mobilizim i heshtur”, po përhapet në disa rajone të Rusisë, ndërsa Moska përballet me nevojën për të zëvendësuar humbjet në frontin ukrainas.

Një grua ruse rrëfeu historinë e xhaxhait të saj, një burrë në fund të të pesëdhjetave, i cili vuante nga probleme vaskulare dhe alkoolizmi, ndërsa mezi ecte.

Sipas saj, në korrik disa burra me rroba civile iu afruan përpara pallatit dhe e morën me makinë. Ata i kërkuan të firmoste një dokument, duke i thënë se bëhej fjalë për një formalitet. Më vonë, familjarët zbuluan se ai kishte nënshkruar një kontratë për t’iu bashkuar ushtrisë.

Pas disa ditësh, burri telefonoi nga një qendër stërvitore në Luhansk, në territorin ukrainas të kontrolluar nga Rusia. Në fund të shtatorit, familja u njoftua se ai rezultonte i zhdukur gjatë luftimeve.

Avokati rus Artem Klyga, i cili jeton në Berlin dhe këshillon qytetarët për të drejtat e tyre lidhur me shërbimin ushtarak, deklaroi se raste të ngjashme janë shtuar ndjeshëm që prej fillimit të verës.

Sipas tij, personat më të rrezikuar janë ata që kanë probleme financiare, shëndetësore ose varësi nga alkooli, pasi shpesh nuk i njohin të drejtat e tyre dhe e kanë të vështirë t’i rezistojnë presionit.

Edhe koalicioni i avokatëve për të drejtat e rekrutëve, “Call to Conscience”, raportoi një rritje të denoncimeve për rekrutime të detyruara gjatë korrikut dhe gushtit.

Pagesa deri në 300 mijë rubla për çdo ushtar të rekrutuar

Një tjetër element i investigimit lidhet me shpërblimet financiare për personat që ndihmojnë në sigurimin e rekrutëve të rinj.

Guvernatori i rajonit rus të Rjazanit, Pavel Malkov, ka njoftuar pagesa nga 50 mijë deri në 300 mijë rubla, afërsisht 590 deri në 3 500 dollarë, për çdo person që ndihmon në rekrutimin e një ushtari me kontratë.

CNN raporton se ka identifikuar skema të ngjashme dhe dhjetëra njoftime pune në rajone të ndryshme të Rusisë.

Përfaqësues të organizatës kundër luftës “New Alternative Route” pretendojnë se kjo praktikë krijon mundësi abuzimi, pasi ndërmjetësit kanë interes financiar të sigurojnë sa më shumë nënshkrime, pavarësisht gjendjes së personave që rekrutojnë.

Autoritetet ruse kanë mohuar raportimet për mobilizim të detyruar në raste të caktuara, ndërsa Kremlini ka kundërshtuar pretendimet se po përgatit një valë të re mobilizimi masiv.

Ekspertët paralajmërojnë se shtimi i praktikave të tilla mund të shkaktojë pakënaqësi në shoqërinë ruse, veçanërisht pas mobilizimit të vitit 2022, i cili nxiti largimin e mijëra qytetarëve nga vendi.