TIRANË — Bashkia e Tiranës ka publikuar listën me rreth 1500 fituesit e radhës të programit social për subvencionimin e interesave të kredive, me qëllim lehtësimin e blerjes së banesave për familjet në kryeqytet.

Projektvendimi me emrat e aplikuesve fitues është dërguar zyrtarisht për miratim në mbledhjen e muajit tetor të Këshillit Bashkiak. Përmes këtij programi, i cili synon mbështetjen e familjeve dhe individëve me të ardhura të limituara, shteti subvencionon pjesën më të madhe të interesit bankar, duke bërë që përfituesit ta shlyejnë me një normë fikse prej 3%.

“Pas miratimit të listës nga Këshilli Bashkiak, fituesit duhet të paraqiten pranë bankave të nivelit të dytë me të cilat Bashkia e Tiranës ka lidhur marrëveshje, për të vijuar procedurat e përfitimit të kredisë së butë për blerjen e banesës”, bëhet me dije nga struktura përgjegjëse.

Sasia e financimit që do të përfitojë secila familje përcaktohet mbi bazën e numrit të anëtarëve dhe kritereve të përcaktuara në udhëzuesin e programit, duke u ofruar qindra qytetarëve mundësinë e sigurimit të një strehe me kushte të lehtësuara financiare.