TIRANË — Kryeministri Edi Rama ka përsëritur thirrjen drejtuar protestuesve për t’u ulur në bisedime, duke rikthyer sërish përpara godinës së Kryeministrisë strukturën simbolike prej guri me mbishkrimin "dialog".

Ndryshe nga ditët e mëparshme, në hapësirën e improvizuar mungojnë karriget dhe jastëkët. Ky ndryshim vjen si rrjedhojë e veprimeve të protestuesve gjatë tubimeve të fundit, të cilët i dogjën shiltet dhe rrokullisën blloqet e gurit në shenjë refuzimi ndaj ftesave të ekzekutivit.

Pavarësisht insistimit të përsëritur të kryeministrit për nisjen e bisedimeve, studentët dhe protestuesit vazhdojnë të mbajnë të njëjtin qëndrim, duke këmbëngulur në plotësimin e kërkesave të tyre dhe largimin e kreut të qeverisë.