Kryeministri Edi Rama doli para pak me një deklaratë në platformën X ku fajësoi ish paraardhësin e tij Sali Berisha dhe pjesëmarrësit në protestë për plagosjen e të riut Erion Vishkulli të cilit i rrezikohet shikimi nga goditja me plumb gome në sy që i shkaktoi policia.

"Pjesëmarrja në protestat e dhunshme është sigurisht e rrezikshme edhe për vetë dhunuesit dhe ata që rrinë rrotull tyre, aq më tepër kur dihet tanimë edhe botërisht që në këto protesta është edhe dora e një matufi maniak me një biografi të pasur me zjarrvënie e me gjakderdhje", thotë Rama në deklaratën ku përgjegjësinë e gjen te Berisha dhe vetë protestuesit, për reagimin policor që çoi në dëmtimin e Vishkullit.

"Më vjen shumë keq kur kushdoqoftë lëndohet fizikisht, qoftë edhe një protestues i dhunshëm, por si mund të shmanget çdo lëndim i mundshëm nëse dhuna e dikton natyrën e një proteste?!", pyet Rama duke justifikuar kështu reagimin policor.

Në këtë pikë, sërish Rama gjen fajtorë dhe shigjeton mediat si përgjegjëse kur thotë: "lëndimi i djalit nga Elbasani duhet të jetë një këmbanë alarmi për të gjithë, po mbi të gjitha për nxitësit e dhunës që propagandojnë nga ekranet e korruptuara televizive dhe nga pasqyrat e tyre sociale apo më zi akoma që paguajnë për mish për top lloj-lloj individësh, nga kriminelë, te djem të paditur e deri te fëmijë të mitur".

Megjithatë Rama njofton se është marrë "personalisht që mbrëmë me sigurimin e kurimit të djalit në spitalin më të mirë të Italisë, si edhe të transportit me një avion charter mjekësor".

Por sërish, Rama nuk ndalet në akuza kur shprehet: "U them të gjithë atyre që po e keqpërdorin si të tërbuar syrin e plagosur të tij për të nxitur më tej dhunën: Ju jeni errësira që i mbylli atij djali dritën e syrit!". Këtu Rama bën fakt të kryer se i riu e ka humbur shikimin.

Në fund të deklaratës së tij, Rama ka edhe një paralajmërim të mistershëm kur flet në emër të popullit: "Shqiptarët s’do t’ua falin. Prisni dhe shikoni". /noa.al