TIRANË, 25 Tetor 2026 — Ministri i Brendshëm, Ervin Demo, ka bërë një reagim zyrtar pas përplasjeve të dhunshme të regjistruara gjatë protestës së të shtunës në Tiranë, duke dënuar sulmet ndaj punonjësve të Policisë së Shtetit dhe dëmtimin e pronës publike e private.

Në deklaratën e tij, ministri theksoi se çdo akt dhune do të hetohet me vendosmëri dhe përgjegjësit do të përballen me ligjin. Demo bëri të ditur se hetimet nuk do të kufizohen vetëm te autorët e drejtpërdrejtë në shesh, por do të shtrihen edhe te dyshimet për organizimin, financimin apo nxitjen e akteve të dhunshme nga struktura politike apo grupime ekstremiste.

Nga ana tjetër, kreu i Ministrisë së Brendshme siguroi se ligji do të zbatohet me të njëjtën paanshmëri edhe ndaj vetë forcave të rendit. Demo konfirmoi pezullimin nga detyra të punonjësit të policisë dhe nisjen e hetimeve zyrtare për rastin e 28-vjeçarit Erjon Vishkulli, i cili u lëndua rëndë në sy nga një plumb gome.

Ministri përsëriti gatishmërinë e qeverisë për të garantuar të drejtën e protestës paqësore dhe për t’u ulur në dialog demokratik me qytetarët, duke nëvizuar se aktet e dhunës dhe përplasjet fizike nuk mund të shërbejnë si mjete presioni ndaj institucioneve kushtetuese të vendit.

Reagimi i plotë:

Dje, qendra e Tiranës u përball sërish me një valë të rëndë dhune. Persona të maskuar sulmuan punonjësit e Policisë së Shtetit me gurë, mjete piroteknike, shkopinj e sende të forta, dëmtuan institucione publike, shkatërruan dhe plaçkitën prona private, duke rrezikuar jetën dhe sigurinë e qytetarëve dhe të forcave të rendit.

Këto akte nuk kanë asgjë të përbashkët me protestën paqësore dhe me të drejtën kushtetuese të qytetarëve për të shprehur pakënaqësitë e tyre. Aktet e dhunës nuk mund të justifikohen në emër të protestës dhe as të përdoren si instrument politik për destabilizimin apo goditjen e institucioneve të vendit.

Përgjegjësia nuk kufizohet domosdoshmërisht tek autorët e drejtpërdrejtë. Çdo dyshim për organizimin, financimin apo nxitjen e akteve të dhunës, përfshirë përfshirjen e mundshme të strukturave politike apo grupimeve ekstremiste, duhet të hetohet nga organet kompetente dhe të vlerësohet mbi bazën e provave.

Për çdo shkelje të ligjit do të kërkohet përcaktimi i përgjegjësisë individuale dhe, sipas rastit, përgjegjësisë për dëmet e shkaktuara ndaj pronës publike dhe private, në përputhje me procedurat ligjore.

Por dua të jem po aq i qartë edhe për një parim tjetër themelor: ligji është i njëjtë për të gjithë, edhe për ata që mbajnë uniformën e Policisë së Shtetit.

Çdo pretendim për përdorim të paligjshëm apo joproporcional të forcës duhet të hetohet me paanshmëri. Pezullimi i punonjësit të Policisë dhe nisja e hetimeve për rastin e të riut të lënduar në sy janë hapa konkretë për zbardhjen e plotë të ngjarjes dhe përcaktimin e përgjegjësive mbi bazën e provave.

Çdo qytetar dhe çdo punonjës policie i lënduar meriton vëmendje, kujdes dhe respekt. Siguria publike është, mbi të gjitha, mbrojtje e jetës dhe e integritetit fizik të njerëzve.

Shpreh mbështetjen dhe mirënjohjen time për punonjësit e Policisë së Shtetit që, në kushte të vështira dhe përballë rrezikut, vijojnë të përmbushin detyrën e tyre. Kjo detyrë kërkon vendosmëri, por gjithmonë profesionalizëm, vetëpërmbajtje dhe respektim të ligjit.

Në Francë, në Itali, në Shqipëri apo në çdo demokraci europiane, parimi është i njëjtë: liria e protestës mbrohet, ndërsa aktet e dhunës trajtohen sipas ligjit.

Qeveria mbetet e hapur për dialog me qytetarët dhe për adresimin e kërkesave të tyre legjitime. Zëri i qytetarëve duhet të dëgjohet, por dhuna nuk mund të jetë mjet presioni ndaj institucioneve dhe as të zëvendësojë dialogun demokratik.

Detyra jonë është të garantojmë që çdo qytetar të protestojë i lirë dhe i sigurt, që Policia të ushtrojë autoritetin e saj vetëm brenda kufijve të ligjit dhe që askush të mos qëndrojë mbi të.

Vendosmëri ndaj dhunës.

Respekt për protestën paqësore. Përgjegjësi përpara ligjit, pa përjashtim.