TIRANË – Situata para Ministrisë së Arsimit dhe Sportit është tensionuar pas ndërhyrjes së forcave të rendit për të shpërndarë protestuesit. Pas hedhjes së objekteve të forta në drejtim të godinës, Policia e Shtetit ka përdorur gaz lotsjellës dhe autobotin me ujë për të vendosur kontrollin.

Pas shpërndarjes nga zona e ministrisë, grupi i protestuesve ka marshuar përgjatë bulevardit kryesor, duke u zhvendosur për t’u riorganizuar para Kryeministrisë. Përplasjet dhe tensionet e ndodhura gjatë ditës kanë sjellë thirrje të herëpashershme nga autoritetet për ruajtjen e rendit dhe shmangien e akteve të dhunës.