KORÇË — Një ngjarje e rëndë është regjistruar në një kopsht të qytetit të Korçës, ku një edukatore është arrestuar nga Policia e Shtetit pas denoncimit dhe pamjeve filmike që dëshmojnë ushtrimin e dhunës ndaj një fëmije 4-vjeçar.

Nëna e të miturit, Volsjana Plasa, ka rrëfyer mes lotësh tmerrin e përjetuar nga i biri, i cili prej ditësh i ankohej për dhunë fizike dhe psikologjike nga stafi edukativ, përfshirë edhe mbylljen në një ambient të izoluar.

“Para katër ditësh, djali më është ankuar. Më ka thënë: ‘Mami, mësuesja më godet’. Kam shkuar atje dhe u kam thënë se fëmija ankohet që mësuesja e godeste. Ato më thanë: ‘Jo, se ky është fëmijë. Pse gënjen ti?’ Ia thanë djalit në praninë time. Ditën tjetër, gjatë rrugës djali më tha: ‘Mami, mos më shpëto, unë kam frikë, më godet mësuesja’. Ai më tregoi se e kishte futur edhe në qilar”, tregoi nëna e fëmijës.

Sipas rrëfimit të saj, përballja më e tensionuar ndodhi kur shkoi për ta marrë djalin nga kopshti dhe e gjeti atë në oborr nën presionin e edukatores.

“Kjo mësuesja e kishte kapur djalin për dore, e kishte shtrënguar dhe po i thërriste. Me atë që pashë unë, u tmerrova. I thoshte: ‘Ti pse gënjen? Janë kamerat aty, po s’të besohet? Hapni kamerat, të shikoni vetë’. Unë e lë fëmijën në kopsht per ta edukuar, jo që të dhunohet. I thashë se do të përballej me ligjin. E mora fëmijën dhe shkova drejt e në komisariat, ku bëra deklarimin tim në prani të policisë”, u shpreh ajo.

Plasa tregon gjithashtu se më parë kishte vërejtur edhe shenja fizike në trupin e të miturit, ndërsa u bëri thirrje institucioneve të ushtrojnë kontrolle të rrepta në kopshte.

“Në ditët e para të kopshtit, fëmija kishte një shenjë të kuqe në qafë dhe më tha se e goditi mësuesja. Në atë moment nuk i kushtova shumë vëmendje, por më pas gjithçka mori tjetër kuptim. Mirë që fëmija im foli dhe di të tregojë çfarë i ka ndodhur, po ata fëmijë që nuk flasin? Kush e di sa mund të kenë vuajtur. U lutem institucioneve arsimore të bëjnë kontrolle”, përfundoi Plasa.

Pas denoncimit të nënës dhe këqyrjes së pamjeve nga kamerat e sigurisë, policia ekzekutoi arrestimin e edukatores, ndërsa materialet i kaluan prokurorisë për hetim të mëtejshëm.