TIRANË — Deputetja e Partisë Demokratike, Jorida Tabaku, u ka bërë thirrje qytetarëve për pjesëmarrje masive në protestën kombëtare, duke e cilësuar praninë e tyre në shesh si përgjigjen e vetme ndaj një sistemi që mbështetet te frika dhe përqendrimi i pushtetit.

Përmes një mesazhi të shpërndarë në rrjetet sociale, Tabaku denoncoi sjelljen e autoriteteve ndaj protestuesve gjatë dhjetë ditëve të fundit, duke theksuar se të rinjtë, studentët, pedagogët dhe mësuesit janë përballur me dhunë, arrestime, kërcënime dhe shpifje thjesht sepse kërkojnë të dëgjohen.

“Sot në protestë është shumica e shqiptarëve. Sot rrugët janë mbushur me shumicën e shqiptarëve që duan të ndryshojë ky sistem: ky sistem i frikës, i përqendrimit të pushtetit, i përqendrimit të interesave ekonomike, i sulmit ndaj medias, i sulmit ndaj shqiptarëve. Ky sistem do të rrëzohet nga protesta e lirë e njerëzve”, deklaroi Tabaku.

Deputetja demokratike nënvizoi se qëndresa në shesh është e domosdoshme për të mbrojtur zërin e rinisë dhe për të ndalur përçarjen e shoqërisë, duke ftuar qytetarët të bashkohen kundër pakicës në pushtet.