STRASBURG — Një grup prej 12 eurodeputetësh të Parlamentit Evropian, anëtarë të Komisionit të Jashtëm nga radhët e Partisë Popullore Europiane (PPE), i kanë drejtuar një letër zyrtare Përfaqësueses së Lartë të BE-së, Kaja Kallas, ku kërkojnë hetime mbi përdorimin e forcës nga Policia e Shtetit gjatë protestave në Shqipëri.

Përmes kësaj nisme të ndërmarrë nga kreu i delegacionit austriak të PPE-së, Reinhold Lopatka — ku bën pjesë edhe eurodeputeti Fredi Beleri — eurodeputetët ngrenë shqetësime mbi raportimet për përdorimin e plumbave të gomës, plagosjen e protestuesve e gazetarëve, si dhe shkeljen e të drejtave të të miturve të ndaluar gjatë tubimeve.

Eurodeputetët i kërkojnë Shërbimit Evropian të Veprimit të Jashtëm (EEAS) të ndërhyjë drejtpërdrejt pranë autoriteteve shqiptare për të garantuar hetime të pavarura gjyqësore, të kërkojë garanci ligjore për personat e shoqëruar në bashkëpunim me Avokatin e Popullit, si dhe të kushtëzojë ecurinë e Shqipërisë në kuadër të negociatave për BE-në me llogaridhënien e policisë dhe respektimin e të drejtave themelore.

Letra e plotë:

Me iniciativën e kreut të Delegacionit Austriak të PPE-së, Reinhold LOPATKA Demonstratat në Shqipëri kundër korrupsionit, kostove të arsimit dhe pakënaqësive socio-ekonomike janë përshkallëzuar, duke ngritur shqetësime serioze lidhur me sjelljen e policisë.

Raportimet tregojnë se plumbat prej gome të qëlluar nga policia kanë plagosur protestues dhe gazetarë, ndërsa Avokati i Popullit në Shqipëri po heton domosdoshmërinë dhe proporcionalitetin e përdorimit të forcës nga policia. Ekzistojnë gjithashtu shqetësime lidhur me mungesën e garancive të përshtatshme për të miturit e ndaluar.

Deklarata e Komisionit e datës 18 tetor e dënoi me të drejtë dhunën dhe bëri thirrje për proporcionalitet, por nuk trajtoi në mënyrë të mjaftueshme çështjen e llogaridhënies. Të drejtat themelore dhe përgjegjësia për shkeljet e pretenduara duhet të mbeten në qendër të procesit të anëtarësimit të Shqipërisë në BE.

Çfarë masash do të ndërmarrë Përfaqësuesja e Lartë, përmes Shërbimit Evropian të Veprimit të Jashtëm (EEAS), për të:

1. Ngritur drejtpërdrejt këto akuza pranë autoriteteve shqiptare dhe për të kërkuar hetime të pavarura, të paanshme dhe efektive mbi përdorimin e forcës nga policia, pengimin e gazetarëve dhe shkeljet e të drejtave të personave të ndaluar, përfshirë përgjegjësinë e drejtuesve të operacioneve policore, me publikimin e rezultateve dhe marrjen e masave të duhura gjyqësore ose disiplinore në vijim?

2. Kërkuar garanci, në bashkëpunim me Avokatin e Popullit në Shqipëri dhe përmes monitorimit të pavarur, që të gjithë personat e ndaluar, veçanërisht të miturit, të përfitojnë nga garancitë ligjore të kërkuara nga legjislacioni shqiptar dhe standardet ndërkombëtare të të drejtave të njeriut?

3. Siguruar që angazhimet në kuadër të Grupkapitullit 1 – Themeloret, veçanërisht ato që lidhen me llogaridhënien e policisë dhe të drejtat themelore, të ndiqen në mënyrë të qartë aty ku vazhdojnë të evidentohen mangësi, duke përcaktuar angazhime të matshme për parandalimin e shkeljeve të mëtejshme?