VARESE — Një ngjarje e rëndë ka ndodhur në Vergiate të provincës së Vareses në Itali, ku një 36-vjeçare është gjetur e pajetë në dhomën e saj të gjumit me disa plagë të shkaktuara nga goditjet me thikë.

Për krimin është ndaluar partneri i saj, 53-vjeçari Marco Panichi, i cili u dorëzua vetë te karabinierët e Avezzanos. Pas deklaratës së tij, forcat e rendit mbërritën në banesë ku gjetën trupin e pajetë të viktimës me dëmtime të shumta në trup dhe qafë, si dhe thikën e kuzhinës të përdorur në krim.

Gjatë marrjes në pyetje, i dyshuari dhe avokati i tij mbrojtës pretenduan se ngjarja ndodhi për motive xhelozie dhe se 53-vjeçari veproi në vetëmbrojtje pasi u sulmua fillimisht nga partnerja, duke pësuar edhe vetë plagë në krah dhe dorë. Trupi i viktimës është dërguar në Institutin e Mjekësisë Ligjore në Pavia për autopsi, ndërsa Prokuroria e Busto Arsizios po vijon hetimet për verifikimin e këtij versioni dhe zbardhjen e plotë të dinamikës.