FIER — Prokuroria pranë Gjykatës së Shkallës së Parë të Juridiksionit të Përgjithshëm Fier ka mbyllur hetimet dhe ka dërguar për gjykim dosjen penale ndaj shtetases Emanilda Rama e akuzuar për vrasjen e babait të saj Anesti Rama në banesën e tyre në fshatin Frashër të Patosit.

Sipas organit të akuzës, e dëmtuara akuzohet për veprën penale “Vrasja për shkak të marrëdhënieve familjare”, pasi i ka shtrënguar të atit qafën me një lak teli, duke i shkaktuar asfiksi dhe vdekjen e menjëhershme.

Bashkë me të, në gjyq është dërguar edhe e ëma, shtetasja V.R., e cila akuzohet për “Veprime që pengojnë zbulimin e së vërtetës”.

Nga hetimet ka rezultat se pas krimit, bashkëshortja e viktimës ka pastruar ambientin e ngjarjes dhe ka larë trupin e të ndjerit përpara mbërritjes së policisë, me qëllim fshehjen e gjurmëve dhe prishjen e provave.

Provat mjeko-ligjore dhe këqyrja e vendit të ngjarjes kanë shërbyer për t’i kaluar të dyja shtetaset për gjykim zyrtar.

Njoftimi i plotë i Prokurorisë Fier:

 Prokuroria Fier përfundon hetimet dhe dërgon në gjyq shtetasen E.R. për vrasjen e babait të saj dhe të ëmën për fshehjen e gjurmëve të krimit

Prokuroria pranë Gjykatës së Shkallës së Parë e Juridiksionit të Përgjithshëm, Fier përfundoi hetimet dhe dërgon në gjyq shtetasen E.R., e akuzuar për kryerjen e veprës penale ‘Vrasje për shkak të marrëdhënieve familjare’ parashikuar nga neni 79/a të Kodit Penal dhe shtetasen V.R., e akuzuar për kryerjen e veprës penale ‘Veprime që pengojnë zbulimin e së vërtetës’, parashikuar nga neni 301 të Kodit Penal.

Në përfundim të hetimeve, mbi procedimin penal nr.1073/2025, rezultoi se më 23/07/2025, në banesën e familjes, në fshatin Frashër, Patos, shtetasja E.R. ka vrarë babain e saj, shtetasin A.R., duke i shtrënguar qafën me një lak teli, duke i shkaktuar asfiksi dhe vdekjen e menjëhershme.

Pas ngjarjes dhe përpara mbërritjes së shërbimeve të policisë, shtetasja V.R., bashkëshortja e viktimës dhe nëna e të akuzuarës, ka kryer veprime për pastrimin e ambientit ku u gjet viktima dhe për larjen e trupit të tij. Këto veprime kanë pasur si qëllim ndryshimin ose fshehjen e gjurmëve dhe pengimin e zbulimit të së vërtetës.

Nga analiza e deklarimeve të administruara, rezultateve të ekspertimit mjeko-ligjor, këqyrjes së vendit të ngjarjes, sendeve të sekuestruara dhe provave të tjera të administruara gjatë hetimit, Prokuroria pranë Gjykatës së Shkallës së Parë e Juridiksionit të Pëtgjithshëm Fier arriti në përfundimin se shtetasja E.R. ka kryer veprimet që kanë sjellë vdekjen e babait të saj, ndërsa shtetasja V.R. ka kryer veprimet e mësipërme me qëllim pengimin e zbulimit të së vërtetës.