KORÇË — Një edukatore është arrestuar nga specialistët e Komisariatit të Policisë Korçë, pasi akuzohet se ka dhunuar një fëmijë 4-vjeçar brenda ambienteve të kopshtit ku ai qëndronte.

Procedimi penal ndaj edukatores ka nisur pas denoncimit të bërë nga nëna e fëmijës, e cila i është drejtuar policisë pasi ka reaguar ndaj ndryshimit të gjendjes emocional-psikologjike të të birit gjatë ditëve të fundit. I mituri i ka rrëfyer prindit se ishte goditur nga edukatorja.

Pas marrjes së kallëzimit, uniformat blu kanë kryer veprimet procedurale, përfshirë sekuestrimin dhe këqyrjen e pamjeve nga kamerat e sigurisë të kopshtit, çka ka çuar në prangosjen e edukatores për veprën penale “Keqtrajtimi i të miturve”. Materialet i janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.