TIRANË, 23 Tetor 2026 — Një 20-vjeçar i ndaluar gjatë protestave të fundit në kryeqytet ka denoncuar publikisht trajtimin degradues dhe dhunën fizike e psikologjike të ushtruar, sipas tij, nga efektivët e forcave “Shqiponja” dhe punonjësit e policisë gjatë shoqërimit dhe qëndrimit në komisariat.

I riu pretendoi se është arrestuar nga pesë efektivë të maskuar, të cilët ushtruan dhunë fizike duke e goditur me shqelma, grushte dhe shkop kumagume në kokë, bark dhe këmbë, pa bërë asnjë rezistencë. Më tej, ai dëshmoi se gjatë transportit në furgonin e policisë, një prej efektivëve të maskuar ka kryer veprime ngacmuese ndaj një vajze të re të ndaluar, duke e prekur dhe puthur me forcë.

Sipas dëshmisë së të riut, dhuna fizike ka vijuar edhe brenda ambienteve të Komisariatit Nr. 1 në Tiranë, ku pretendon se të ndaluarit janë goditur në hapësira pa kamera, si tualetet, duke shkaktuar dëmtime fizike te të arrestuarit.

I riu ngriti gjithashtu shqetësimin për akuzat penale të ngritura ndaj tij dhe protestuesve të tjerë pas ndalimit tri-ditor, ndërsa denoncoi heshtjen e institucioneve mbrojtëse të të drejtave të njeriut përballë këtyre pretendimeve grave.