Policia e Tiranës ka reaguar pas publikimit të një videoje në rrjetet sociale nga një familje, e cila pretendon se efektivët dhe një oficer i Policisë Gjyqësore kanë ndërhyrë gjatë natës në banesën e tyre.

Sipas njoftimit zyrtar, më 20 tetor 2026, një 17-vjeçar ka kallëzuar se ishte dhunuar dhe grabitur në rrugën “Hoxha Tasim”. I mituri ka deklaruar se një person i panjohur, nën kërcënimin e një thike, i kishte marrë portofolin dhe i kishte shkaktuar dëmtime trupore.

Pas veprimeve hetimore, shërbimet e Komisariatit të Policisë Nr. 1 kanë identifikuar dhe ndaluar mbrëmjen e 22 tetorit një 25-vjeçar, me inicialet F. M., i dyshuar për veprën penale “Vjedhja me dhunë”.

Në vijim të procedurave, policia ka ushtruar kontroll në banesën e tij. Sipas autoriteteve, babai dhe motra e 25-vjeçarit kanë kundërshtuar punonjësit e policisë gjatë ndërhyrjes, me qëllim pengimin e kontrollit.

Për këtë ngjarje, shtetasit F. M. dhe M. M. janë proceduar penalisht në gjendje të lirë për veprat penale “Pengimi i zbulimit të së vërtetës” dhe “Kundërshtimi i punonjësit të policisë së rendit publik”.

Materialet procedurale i janë referuar Prokurorisë për veprime të mëtejshme.

Policia nuk ka dhënë detaje të tjera lidhur me pretendimet e familjes të publikuara në videon që qarkullon në rrjetet sociale.

Njoftimi i policisë:

Drejtoria Vendore e Policisë Tiranë

Në lidhje me një video të publikuar në rrjetet sociale, në të cilën pretendohet se shërbimet e Policisë kanë ndërhyrë gjatë natës në banesën e një familjeje, sqarojmë se:

Më datë 20.10.2026, një shtetas i mitur, 17 vjeç, ka kallëzuar se, në rrugën “Hoxha Tasim”, një shtetas i panjohur, nën kërcënimin e një mjeti prerës(thikë), i kishte vjedhur me dhunë portofolin, duke i shkaktuar dëmtime trupore.

Si rezultat i veprimeve të shpejta hetimore, shërbimet e Komisariatit të Policisë Nr. 1 kanë bërë të mundur identifikimin dhe ndalimin, mbrëmjen e datës 22.10.2026, të shtetasit F. M., 25 vjeç, për veprën penale “Vjedhja me dhunë”.

Në vijim të veprimeve procedurale, shërbimet e Policisë kanë kryer kontrollin e banesës së këtij shtetasi.

Në kohën kur shërbimet e Policisë do të kryenin kontrollin e banesës, babai dhe motra e 25-vjeçarit kanë kundërshtuar punonjësit e Policisë, me qëllim pengimin e tyre në ushtrimin e kontrollit të banesës.

Në vijim të veprimeve, u proceduan penalisht në gjendje të lirë shtetasit F. M. dhe M. M., për veprat penale “Pengimi i zbulimit të së vërtetës” dhe “Kundërshtimi i punonjësit të policisë së rendit publik”.

Materialet procedurale iu referuan Prokurorisë për veprime të mëtejshme.