Detaje të reja janë zbardhur nga plagosja e trefishtë e ndodhur mesditën e sotme në Has, ku tre të mitur mbetën të plagosur pas një konflikti.

Sipas informacionit paraprak të policisë, ngjarja ndodhi rreth orës 13:35, në rrugën “Lidhja e Prizrenit”, jashtë ambienteve të një bilardoje.

Autori i dyshuar, 16-vjeçari me inicialet A. G., dyshohet se ka goditur me bixhak tre bashkëmoshatarët e tij, të cilët rezultojnë të jenë edhe shokë klase.

Të plagosurit u dërguan fillimisht në Spitalin Rajonal të Kukësit, ndërsa dy prej tyre u transportuan drejt Prizrenit për ndihmë mjekësore më të specializuar.

Ndërkohë, policia ka shoqëruar edhe një tjetër 16-vjeçar, i dyshuar si përkrahës i autorit të plagosjes.

Në cilësinë e provës materiale është sekuestruar bixhaku i përdorur gjatë konfliktit, ndërsa hetimet vijojnë për zbardhjen e plotë të ngjarjes.