TIRANË — Kryetari i Partisë Demokratike, Sali Berisha, ka reaguar publikisht pas deklaratës së studentit të Mjekësisë, Jon Sulejmeri, duke e cilësuar reagimin e tij ndaj akuzave të kryeministrit Edi Rama si një goditje direkte ndaj manipulimeve të pushtetit.

Përmes një deklarate për mediat, Berisha dënoi publikimin e fotove dhe akuza-shpifjeve nga ana e kreut të qeverisë ndaj të rinjve, ndërsa krahasoi sjelljen e ekzekutivit me atë të regjimeve diktatoriale që kërkojnë të nxisin përplasje sociale.

“Përgjigjen më të shkëlqyer ia dhanë sot nga protesta e mjekësisë. Doli studenti, unë jam, tha. Çfarë ishte ai? Ai ishte student me të gjitha dhjeta. Dhe ky e paraqiste atë si kriminel. Ky nuk ka nder, nuk ka fëmijë, nuk ka familje, nuk ka asgjë. Ftoj shqiptarët të krahasojnë fytyrën e këtij studenti guximtar me surratin e një diktatori”, deklaroi Berisha.

Lideri i opozitës ngriti alarmin se dhuna policore dhe përndjekja e të rinjve po çon vendin drejt një konflikti civil, duke pretenduar madje se ka protestues të plagosur që i shmangen spitaleve nga frika e arresteve. Berisha paralajmëroi se familjarët dhe qytetarët nuk do ta tolerojnë më presionin shtetëror ndaj lëvizjes studentore.