Rama akuzon PD-në për dhunën në protesta: Mori autorësinë e ngjarjeve te Ministria e Arsimit

Kryeministri Edi Rama ka akuzuar Partinë Demokratike se është përfshirë në përshkallëzimin e dhunës gjatë protestave të fundit në Tiranë, duke pretenduar se pas incidenteve qëndrojnë edhe grupe kriminale dhe financime nga jashtë.

Në një komunikim publik, Rama deklaroi se dhuna ishte përgatitur prej muajsh dhe se Policia e Shtetit disponon informacione për organizatorët dhe personat e përfshirë.

“Përshkallëzimi është përgatitur për disa muaj. Të dhënat e futjes në Shqipëri të maskave, të lëndëve eksplozive e kështu me radhë përmes doganës dhe nga subjekte të caktuara, janë tanimë në duart e Policisë së Shtetit”, tha Rama.

Ai e përmendi drejtpërdrejt Partinë Demokratike, duke e akuzuar se ka marrë përgjegjësinë për nisjen e incidenteve pranë Ministrisë së Arsimit.

“Në duart e Policisë së Shtetit janë edhe pjesëmarrësit apo më saktë një pjesë e pjesëmarrësve në këtë dhunë të financuar drejtpërdrejt nga krimi i organizuar dhe nga forca të huaja, nga para’ e ardhur nga jashtë, ku padyshim qershia mbi tortë ose më saktë glasa mbi tortë është Partia Demokratike, e cila dje mori dhe autorësinë e fillimit të dhunës tek Ministria e Arsimit”, deklaroi kryeministri.

Rama publikoi gjithashtu inicialet dhe të dhënat për precedentët penalë të dhjetëra personave të ndaluar gjatë protestave, duke pretenduar se ata nuk kanë lidhje me studentët.

“Këta nuk janë studentët. E kam thënë qysh në krye të herës, këta nuk janë studentët”, u shpreh ai.

Kryeministri theksoi se e drejta për të protestuar është e padiskutueshme, por kërkoi distancimin nga dhuna.

“Dhuna nuk është ide. Dhuna është krim. Dhuna është armik i demokracisë, është armik i lirisë”, deklaroi Rama.

Akuzat për përfshirjen e PD-së, krimit të organizuar dhe financimeve të huaja mbeten pretendime të kryeministrit, për të cilat në këtë komunikim nuk u paraqitën prova të verifikueshme në mënyrë të pavarur.