Lezhë, 23 tetor 2026 – Një 47-vjeçar i shpallur në kërkim për plagosjen me armë zjarri të një të riu dhe vjedhjen e automjetit të tij është arrestuar nga Policia Kufitare në Rinas, teksa dyshohet se po tentonte të largohej nga Shqipëria.

I arrestuari, Klodian Ndoj, banues në fshatin Sanxhak, akuzohet se në muajin korrik, gjatë një konflikti për motive të dobëta, ka plagosur me armë zjarri një 22-vjeçar, të identifikuar me inicialet V. P., dhe më pas i ka vjedhur automjetin.

Për 47-vjeçarin, Gjykata e Lezhës kishte caktuar në muajin gusht masën e sigurisë “Arrest në burg”, për veprat penale “Plagosja e rëndë me dashje”, “Vjedhja” dhe “Mbajtja pa leje dhe prodhimi i armëve, armëve shpërthyese dhe i municionit”.

Kapja e tij u bë e mundur falë koordinimit mes specialistëve për Hetimin e Krimeve të Rënda, shërbimeve të Komisariatit të Policisë Kurbin dhe Policisë Kufitare në pikën e kalimit kufitar të Rinasit.

47-vjeçari u ndalua në dalje të Republikës së Shqipërisë, ndërsa ndaj tij pritet të vijojnë procedurat ligjore për veprat penale për të cilat akuzohet.

Materialet procedurale iu referuan Prokurorisë për veprime të mëtejshme.