Tiranë, 23 tetor 2026 – Kryeministri Edi Rama ka mbledhur paraditen e sotme ministrat e kabinetit qeveritar dhe drejtuesit politikë të Partisë Socialiste në një takim në rezidencën qeveritare, të njohur si Vila e Kuqe, në Tiranë.

Mbledhja ka nisur rreth orës 09:00, ndërsa në të marrin pjesë, përveç ministrave, edhe drejtues politikë të socialistëve.

Një nga çështjet që pritet të diskutohet lidhet me raportimin e ministrave për drejtuesit e agjencive në varësi të institucioneve që ata drejtojnë, të cilëve u është kërkuar dorëheqja.

Takimi zhvillohet në një moment kur vëmendja është përqendruar te vendimmarrja e qeverisë dhe ndryshimet e mundshme në drejtimin e institucioneve në varësi të ministrive.

Deri më tani nuk janë bërë publike detaje të tjera mbi rendin e plotë të ditës apo vendimet që mund të dalin nga mbledhja.