Athinë, 23 tetor 2026 – Parlamenti i Greqisë ka miratuar një projektligj që ndalon përdorimin e platformave të mediave sociale nga fëmijët nën moshën 15 vjeç, në një masë që synon të kufizojë ekspozimin e të miturve ndaj rreziqeve të rrjeteve sociale.

Ndalimi do të hyjë në fuqi më 1 janar 2027 dhe do t’u kërkojë platformave të marrin masa për verifikimin e moshës së përdoruesve.

Kryeministri grek, Kyriakos Mitsotakis, ka deklaruar se platformat do të kenë rreth dy muaj e gjysmë kohë për të hartuar mekanizmat e nevojshëm për verifikimin e moshës, duke garantuar njëkohësisht mbrojtjen e të dhënave personale dhe privatësinë e përdoruesve.

Qeveria greke e ka argumentuar masën me shqetësimet në rritje për ndikimin e përdorimit të zgjatur të rrjeteve sociale te fëmijët, veçanërisht në lidhje me gjumin, përqendrimin dhe marrëdhëniet e tyre shoqërore.

Sipas autoriteteve, synimi është që prindërit të kenë një mbështetje shtesë në përpjekjet për të kufizuar kohën që fëmijët kalojnë në platformat sociale.

Greqia është një nga shtatë vendet e Bashkimit Evropian që po punojnë me Komisionin Evropian për gjetjen e një mekanizmi të përbashkët për verifikimin e moshës së përdoruesve në platformat online.

Masa greke vjen pas një sërë nismash të ngjashme në vende të tjera. Australia ishte vendi i parë që miratoi legjislacion për kufizimin e përdorimit të mediave sociale nga të miturit, ndërsa një ligj i ngjashëm në Francë u rrëzua nga Këshilli Kushtetues në gusht.