TIRANË, 22 Tetor 2026 — Një investigim i emisionit “Fiks Fare” ka zbuluar një skemë me dyshime të forta për regjistrime fiktive dhe trafikim të qenieve njerëzore brenda godinave shtetërore të konvikteve studentore në Kamëz.

Nga vëzhgimi në terren rezulton se në godinat e ndërtuara nga shteti shqiptar me një kosto prej rreth 30 milionë eurosh pranë Universitetit Bujqësor të Tiranës, studentët shqiptarë janë të pakët, ndërsa ambientet janë “pushtuar” nga punëtorë të huaj, kryesisht shtetas indianë që punojnë për kompaninë e shpërndarjes së ushqimit “Wolt”.

Kontrata pa tender dhe pazare me godinat e studentëve

Sipas gjetjeve të investigimit, Rezidenca Studentore Nr.1 (Qyteti Studenti), e drejtuar nga Olsi Shahini, ka lidhur marrëveshje direkte me universitete private dhe një firmë private të quajtur “Fenix”, duke i dhënë në përdorim godinat jo për studentë, por për strehimin e punëtorëve të huaj. Këto marrëveshje janë nënshkruar pa asnjë procedurë ankandi apo tenderi publik.

Më tej, administratori i firmës private që ka marrë godinën në përdorim kryen pazare me tarifat e strehimit. Administratori i kampusit të konvikteve në Kamëz, Edmond Muhametaj, deklaroi se marrëveshjet janë bërë drejtpërdrejt nga drejtoria e Qytetit Studenti dhe njoftoi se do të kallëzojë penalisht administratorin e kompanisë “Fenix” dhe drejtorin e tij për regjistrime fiktive.

Dyshime për regjistrime fiktive dhe trafikim

Investigimi faktokoi raste të regjistrimeve fiktive që ngrenë pikëpyetje serioze mbi vendndodhjen e personave të huaj që hyjnë në Shqipëri. Në një rast konkret, një shtetas indian është regjistruar në konvikt në fund të muajit gusht, ka marrë vërtetimin përkatës dhe bazën e nevojshme, por nuk është paraqitur kurrë në godinë, duke ngritur dyshime se ku ka përfunduar realisht.