VLORË — Qyteti i Vlorës do të përballet me mungesë të furnizimit me ujë të pijshëm gjatë ditës së sotme, për shkak të një defekti të rëndë të shfaqur në rrjetin e shpërndarjes në lagjen “10 Korriku”.

Shoqëria “Ujësjellës Kanalizime Rajoni Vlorë” ka njoftuar zyrtarisht se dëmtimi i tubacionit ka detyruar stakimin e menjëhershëm të stacioneve pompuese për të shmangur humbjet masive dhe për të mundësuar ndërhyrjen e specialistëve.

Sipas njoftimit zyrtar të ndërmarrjes, ndërprerja e ujit do të vijojë deri në sanimin e plotë të avarisë. Ekipet teknike dhe grupet e punës ndodhen në terren ku po punojnë për riparimin e rrjetit dhe rikthimin e furnizimit në kohën më të shpejtë të mundur.