TIRANË — Policia e Shtetit ka përgënjeshtruar publikisht pretendimet e shpërndara në rrjetet sociale lidhur me dërgimin e mesazheve ndaj mësuesve e pedagogëve, lajmet për dorëheqje masive në radhët e uniformave blu, si dhe aludimet për dërgimin e të burgosurve të huaj në Rinas.

Në një deklaratë zyrtare për mediat, shefi i Sektorit të Drejtimit në Departamentin për Sigurinë Publike, Albert Nushi, sqaroi se mesazhet e dërguara në emër të Policisë ku pretendohej se arsimtarët i priste ndjekja penale pasi ishin filmuar në protesta, janë krejtësisht të rreme dhe të orkestruara nga persona ende të paidentifikuar.

“Gjatë ditës së djeshme, disa mësuesve dhe pedagogëve u janë dërguar mesazhe në emër të Policisë së Shtetit, me përmbajtje intimiduese. Sqarojmë se këto mesazhe nuk janë dërguar nga Policia e Shtetit, por nga persona ende të paidentifikuar, me qëllim përhapjen e panikut dhe dëmtimin e besimit të qytetarëve te Policia. Sigurojmë mësuesit dhe pedagogët se e drejta për t’u tubuar paqësisht është një e drejtë kushtetuese”, deklaroi Nushi.

Përfaqësuesi i policisë hodhi poshtë gjithashtu lajmet se efektivët po japin dorëheqje masive apo se drejtuesit kanë dhënë urdhra të paligjshëm për përdorim violencë gjatë tubimeve.

Në lidhje me pamjet e shpërndara nga aeroporti i Rinasit, Nushi sqaroi se avioni me të huaj të prandaluar nuk ka lidhje me burgjet e vendit, por me procedurat e transportit të emigrantëve të paligjshëm nga Italia drejt qendrës së pritjes në Gjader.