TIRANË — Kryetari i Partisë Demokratike, Sali Berisha, ka reaguar zyrtarisht pas ndërprerjes së seancës plenare në Kuvend, ku deputetët e opozitës bllokuan foltoren duke kërkuar dorëheqjen e kryeministrit Edi Rama, formimin e një qeverie teknike dhe zgjidhje politike për situatën në vend.

Në një deklaratë për mediat nga jashtë ambienteve të Parlamentit, Berisha u shpreh se aksioni i ligjvënësve të opozitës brenda sallës kishte për qëllim përfaqësimin e revoltës rinore që po zhvillohet në rrugë e auditorë.

“Deputetët e opozitës vendosën të jenë sot zëri i kërkesave të protestës së studentëve, vullnetit të studentëve dhe gjimnazistëve, dhe interpretë të interesave të tyre. Ky është parlamenti i krimit dhe ky sistem duhet të marrë fund një minutë e më parë”, deklaroi Berisha.

Kreu i opozitës e cilësoi pushtetin aktual si “narkodiktaturë” dhe pretendoi se trupa parlamentare ka humbur çdo lloj legjitimiteti për shkak se buron nga manipulimi i procesit zgjedhor dhe shërben si mburojë për aferat korruptive. Ai konfirmoi mbështetjen e plotë të forcës politike që drejton ndaj kauzës së studentëve dhe nxënësve të shkollave të mesme.