BUDVA — Komisionerja evropiane për Zgjerimin, Marta Kos, ka deklaruar nga Samiti i Procesit të Berlinit se javët dhe muajt në vijim do të jenë përcaktues për të ardhmen evropiane të vendeve të Ballkanit Perëndimor, ndërsa i bëri thirrje Shqipërisë të ruajë ritmin e reformave.

Gjatë fjalës së saj në punimet e samitit, Kos vlerësoi progresin e shënuar nga Mali i Zi si vendi më i avancuar në procesin e anëtarësimit, duke theksuar se objektivi i radhës për Podgoricën zyrtare është përmbyllja e negociatave dhe kalimi i vijës së finishit.

“Javët dhe muajt në vijim do të jenë vendimtarë për të gjithë ne. Për Malin e Zi, momenti vendimtar do të jetë kalimi i vijës së finishit në procesin e anëtarësimit. Për Serbinë, zgjedhjet e së dielës së ardhshme. Për Shqipërinë, ruajtja e ritmit në rrugën drejt Bashkimit Evropian. Dhe, sigurisht, për Kosovën, zgjedhja vendimtare është të vazhdojë të ecë në përputhje me të drejtën ndërkombëtare dhe shtetin e së drejtës”, u shpreh komisionerja Kos.

Në përfundim të deklaratës, zyrtarja e lartë e BE-së nënvizoi se takimi i udhëheqësve të rajonit në kuadër të Procesit të Berlinit mbetet një platformë thelbësore për bashkëpunimin politik dhe përshpejtimin e integrimit evropian.