TIRANË — Ka ndërruar jetë në spitalin e Traumës në kryeqytet 37-vjeçari Maridon Dhuli, i cili pësoi djegie të shkallës së rëndë pasi automjeti me të cilin po udhëtonte u përfshi nga flakët mbrëmjen e së mërkurës.

Ngjarja e rëndë ndodhi në aksin rrugor Kardhiq–Delvinë, pranë zonës së Skërficës, ku automjeti i tij tip “Volkswagen Touran” mori zjarr në ecje e sipër në rrethana që mbeten ende të paqarta.

Pas incidentit, i riu mori ndihmën e parë nga drejtues automjetesh dhe kalimtarë të rastit, për t’u transportuar fillimisht me urgjencë drejt spitalit të Sarandës dhe më pas në spitalin e Traumës në Tiranë. Pavarësisht përpjekjeve të mjekëve, 37-vjeçari nuk arriti t’u mbijetonte plagëve të rënda. Organet e rendit po vijojnë hetimet për zbardhjen e shkaqeve të shpërthimit të zjarrit në mjet.