TIRANË — Pasi deputetët e opozitës bllokuan foltoren kryesore dhe dëmtuan sistemin elektronik të fjalës, kryetari i Kuvendit, Niko Peleshi, ka marrë vendimin për të kaluar menjëherë seancën plenare në votim manual.

Në kushtet kur sistemi elektronik doli jashtë funksionit gjatë përplasjes ku deputeti Flamur Noka i shkëputi mikrofonin kreut të grupit të PS-së Taulant Balla, drejtuesi i seancës njoftoi se procedurat e votimit të projektligjeve do të kryhen me kartonë ngritur.

Vendimi i Peleshit ka sjellë përshkallëzim të mëtejshëm të tensioneve brenda sallës. Deputetët e Partisë Demokratike kanë përmbysur karriget e tyre, janë grumbulluar rreth foltores dhe kanë goditur tryezat duke lëshuar thirrje kundër mazhorancës. Po ashtu, disa ligjvënës të opozitës i janë afruar ulëseve të mazhorancës duke tentuar t’u marrin me forcë kartat e votimit deputetëve të Partisë Socialiste.