TIRANË — Gjykata e Shkallës së Parë e Juridiksionit të Përgjithshëm Tiranë ka dhënë sot vendimin për masat e sigurisë ndaj 18 personave të arrestuar gjatë protestave të ditëve të fundit në kryeqytet, duke caktuar ndaj tyre masën “detyrim paraqitjeje”.

Togat e zeza e cilësuan të ligjshëm arrestimin e kryer nga forcat e policisë, por urdhëruan lirimin e menjëhershëm të të ndaluarve nga ambientet e paraburgimit. Ky vendim pason masën e ngjashme të dhënë vetëm një ditë më parë, ku gjykata vendosi po detyrim paraqitjeje për 22 protestues të tjerë.

Sipas të dhënave zyrtare, bilanci i gjashtë ditëve të protestave në kryeqytet ka arritur në 271 persona të arrestuar ose proceduar nga organet e rendit. Akuzat kryesore të ngritura nga prokuroria ndaj tyre lidhen me shkatërrimin e pronës publike dhe kundërshtimin me dhunë të punonjësve të Policisë së Shtetit.