BEOGRAD — Qindra studentë dhe qytetarë nga të gjitha rajonet e Serbisë kanë mbërritur në qendër të Beogradit pas një marshimi disaditor me këmbë, për të marrë pjesë në aktin përmbyllës të fushatës elektorale përpara zgjedhjeve të ardhshme parlamentare.

Të rinjtë e grumbulluar në lëvizjen “Lista e Studentëve” përshkuan me qindra kilometra nga Shabaci, Valjeva, Gornji Milanovaci, Novi Sadi dhe Zajeçari. Grupi i nisur nga lindja e vendit e realizoi udhëtimin për gjashtë ditë me radhë duke ecur rreth 240 kilometra, ndërsa të rinjtë e ardhur nga veriu dhe perëndimi hyrën në kryeqytet përmes pikave kryesore transitore.

Përgjatë gjithë rrugëtimit, banorët e zonave ku kaluan marshuesit i mbështetën ata me ushqime dhe pije freskuese, ndërsa pritja në Sheshin e Studentëve u shoqërua me flakadanë, festivale rrugore dhe dorëzimin e certifikatave simbolike të mirënjohjes për pjesëmarrësit.

Mbërritja e studentëve i paraprin tubimit të madh që pritet të mbahet në Sheshin Slavija. Me rastin e grumbullimit, autoritetet e rendit bllokuan qarkullimin në disa akse kryesore administrative për të garantuar mbarëvajtjen e manifestimit dhe sigurinë e këmbësorëve.