RINAS — Pamje të reja të publikuara në mediat vendase dokumentojnë momentin kur disa persona zbresin nga një avion i linjës çarter në aeroportin e Rinasit, të lidhur me pranga në duar dhe disa prej tyre edhe në këmbë, nën shoqërimin e personave me rroba civile dhe efektivëve të Policisë së Shtetit.

Në pamjet e siguruara dallohen të paktën pesë persona me ngjyrë të cilët i drejtohen autobusit të transportit të aeroportit, të ndjekur nga afër nga shoqëruesit civilë. Avioni me të cilin ata mbërritën në kryeqytet i përket kompanisë kroate “Trade Air”, e cila operon fluturime çarter dhe njihet për përdorimin e saj në të kaluarën për procedurat e deportimit nga vendet e Bashkimit Evropian, si Gjermania.

Pavarësisht pamjeve të publikuara, identiteti, shtetësia, statusi ligjor dhe destinacioni përfundimtar i personave të prangosur mbeten ende të pasqaruara. Po ashtu, mbetet i paqartë edhe autoriteti përgjegjës që ka organizuar këtë transport ajror apo vendi i origjinës nga ku është nisur fluturimi.

Në mungesë të një reagimi zyrtar, pamjet kanë nxitur aludime të ndryshme mbi mundësinë e një procedure ekstradimi, deportimi për shkelje të rregullave të emigracionit apo transferimi ndërkombëtar. Nga ana e tyre, Ministria e Brendshme dhe Policia e Shtetit pritet të japin një sqarim zyrtar mbi procedurën ligjore të ndjekur dhe arsyet e këtij fluturimi drejt Tiranës.