MILOÇER — Liderët e Ballkanit Perëndimor dhe përfaqësues të lartë të Bashkimit Evropian mblidhen këtë të enjte në Miloçer të Malit të Zi, ku zhvillohen punimet e Samitit të Liderëve të Procesit të Berlinit.

Në këtë takimin të nivelit të lartë marrin pjesë kryeministri i Shqipërisë Edi Rama, kancelari gjerman Friedrich Merz, kryeministri i Kosovës Albin Kurti, kryeministri i Maqedonisë së Veriut Hristijan Mickoski, kryeministri i Kroacisë Andrej Plenkoviç, si dhe kancelari austriak Christian Stocker.

Pjesë e diskutimeve janë edhe zyrtarë të lartë evropianë, mes të cilëve ministri i Jashtëm italian Antonio Tajani, ministri francez për Evropën Benjamin Haddad dhe komisionerja evropiane për Zgjerimin, Marta Kos. Punimet e samitit fokusohen në thellimin e bashkëpunimit rajonal dhe përshpejtimin e procesit të integrimit evropian.

Përgjatë qëndrimit në Mal të Zi, komisionerja Marta Kos do të zhvillojë takime dypalëshe me presidentin Jakov Milatoviç dhe kryetarin e Kuvendit Andrija Mandiç mbi reformat kyçe të vendit. Në samit marrin pjesë gjithashtu përfaqësues të institucioneve të rëndësishme financiare ndërkombëtare, si Banka Botërore, BEI dhe BERDH.