LUSHNJË — Një aksident i rëndë rrugor ka ndodhur mëngjesin e kësaj të enjteje në aksin Fier-Lushnjë, pranë rreth-rrotullimit të Kolonjës, ku një automjet tip fuoristradë ka dalë nga rruga dhe ka kapërcyer barrierat mbrojtëse metalike.

Si pasojë e përplasjes së fortë, mjeti ka përfunduar në kanalin buzë rrugës, rreth pesë metra poshtë urës. Dy bashkëshortët që udhëtonin në automjet kanë mbetur të plagosur rëndë, ndërsa për nxjerrjen e tyre është dashur ndërhyrja e menjëhershme e shërbimeve zjarrfikëse të Lushnjës dhe e ekipit mjekësor.

Të dëmtuarit janë transportuar me urgjencë drejt spitalit të Lushnjës për të marrë ndihmën e nevojshme mjekësore për shkak të lëndimeve të shumta marra nga aksidenti.

Sipas verifikimeve paraprake të Policisë Rrugore, dyshohet se shpejtësia e lartë dhe lagështira e madhe në rrugë si pasojë e reshjeve të shiut kanë bërë që drejtuesi të humbasë kontrollin mbi automjet në hyrje të rreth-rrotullimit. Grupi hetimor po vijon punën për zbardhjen e plotë të rrethanave të ngjarjes.