MALI I ZI, 21 Tetor 2026 — Kryeministri i Kosovës, Albin Kurti, ka zhvilluar një takim dypalësh me Komisioneren Evropiane për Zgjerim, Marta Kos, në Shën Stefan të Malit të Zi, në margjinat e Samitit të Procesit të Berlinit.

Përmes një postimi në rrjetet sociale, Kurti bëri me dije se gjatë takimit ka kërkuar mbështetje proaktive nga Komisioni Evropian për dhënien e statusit të vendit kandidat për Kosovën dhe hapjen e negociatave për anëtarësim në BE. Ai nënvizoi se përparimi demokratik dhe linjëzimi i Kosovës me politikat e BE-së duhet të reflektohen me hapa konkretë.

Gjatë bisedës, kreu i qeverisë së Kosovës përmendi edhe miratimin e ligjit të fundit për integrimin në SEPA, i cili pritet t’u kursejë qytetarëve, bizneseve dhe diasporës rreth 58 milionë euro në vit, si dhe nisjen e shpejtë të negociatave për zonën pa tarifa shtesë “Roam like at Home”.

Gjithashtu, Kurti theksoi se Kosova i ka ratifikuar të gjitha marrëveshjet e Procesit të Berlinit, përfshirë njohjen e diplomave, duke kërkuar që ato të zbatohen nga të gjitha palët, përfshirë Serbinë.