Mijëra studentë dhe mësues dolën në rrugë në të gjithë Greqinë të mërkurën, duke kërkuar fonde më të larta shtetërore për arsimin, ambiente më të mira dhe klasa më pak të mbushura me njerëz, duke u bërë jehonë protestuesve në vendet e tjera evropiane.

Rreth 10 mijë demonstrues, përfshirë studentë shkollash dhe universitetesh, u mblodhën paqësisht në qendër të Athinës dhe periferi, tha policia.

Të tjerë iu bashkuan tubimeve në qytete në të gjithë vendin, duke shprehur të gjithë solidaritetin e tyre me protestat në rritje në Francë dhe gjetkë në Evropë kundër kostove të larta të jetesës dhe asaj që ata e quajtën kushte të rrënuara shkollore.

Protestat shtojnë presionin mbi qeverinë e qendrës së djathtë të kryeministrit Kyriakos Mitsotakis – e cila përballet me zgjedhje në mesin e vitit 2027 – ndërsa grekët përballen me paga të palëvizshme, qira të larta dhe kosto në rritje të energjisë, vite pas krizës së borxhit në vend.

“Nga Greqia në Francë, ne duam arsim publik dhe falas”, thërrisnin protestuesit ndërsa mblidheshin para parlamentit. Studentët kishin ngritur tenda në sheshin Syntagma, në qendër të Athinës, dhe zhvilluan një protestë gjatë natës, përpara marshimit të së mërkurës.

Funksionimi i shkollave dhe spitaleve publike u ndërpre, pasi disa mësues të shkollave fillore dhe mjekë ndërprenë punën, duke protestuar për pagat dhe mungesën e personelit.

Ministrja e Arsimit, Sofia Zacharaki, deklaroi para protestave se i kishte dëgjuar kërkesat e studentëve.

Ajo pranoi se kostot e strehimit po ushtronin presion mbi familjet greke dhe njoftoi se janë në zbatim projekte me vlerë mbi 733 milionë euro për ndërtimin e rezidencave të reja studentore dhe përmirësimin e infrastrukturës ekzistuese.

Greqia e ka kaluar krizën e borxhit të viteve 2009-2018, periudhë gjatë së cilës pagat dhe shpenzimet për arsimin u shkurtuan si pjesë e masave të ashpra shtrënguese, në këmbim të tre paketave ndërkombëtare të shpëtimit financiar me vlerë rreth 290 miliardë euro.

Që atëherë, pagat janë rritur, por fuqia blerëse reale për shumë grekë mbetet ende ndër më të ulëtat në Bashkimin Evropian; ajo ka pësuar një goditje të re për shkak të rritjes së inflacionit dhe çmimeve të larta të karburanteve, të lidhura me luftën në Iran.

Paga mesatare mujore prej 1 mijë e 500 eurosh e ngecur në nivelin e vitit 2009, ndërsa shumë të rinj grekë e kanë të pamundur të përballojnë strehimin në qytete, për shkak të qirave që janë rritur në mënyrë drastike.