Qeveria shqiptare po përgatit një paketë masash drastike për të frenuar protestat e dhunshme, ndëshkuar sulmet ndaj policisë dhe parandaluar dëmtimin e pronës publike e private. Nisma përfshin masa shtrënguese direkte jo vetëm për protestuesit e dhunshëm, por edhe për familjarët e të miturve të përfshirë, si dhe kufizime të ashpra në udhëtime, arsim, teknologji dhe rrjete sociale.

5 pikat kryesore të paketës së masave:

Kufizimet e udhëtimit dhe aksesit në shërbime:

Krijimi i një regjistri të posaçëm dhe liste të zezë në sistemin TIMS për personat e dhunshëm.

Bashkëpunim me vendet e BE-së për t’u ndaluar hyrjen në zonën evropiane.

Kufizim i aksesit në aeroporte, hotele, trena dhe mjete të tjera transporti.

Masat ndaj të miturve dhe familjeve të tyre:

Detyrimi i prindërve për të paguar dëmet materiale të shkaktuara nga fëmijët e tyre.

Ndërprerja e shërbimeve shtetërore për familjet e të miturve që dëmtojnë pronën.

Shqyrtimi i mundësisë për uljen e moshës së përgjegjësisë penale (aktualisht 14 vjeç).

Masat në sistemin arsimor:

Heqja e bursave dhe mbështetjes financiare shtetërore për studentët e përfshirë në akte dhune.

Masa administrative për nxënësit që braktisin mësimin për të marrë pjesë në protesta.

Përjashtimi nga sistemi arsimor i mësuesve që nxisin nxënësit drejt dhunës.

Ndalimi i maskimit dhe identifikimi me teknologji:

Ndalimi me ligj i pjesëmarrjes në protesta me fytyrë të mbuluar.

Investime në teknologji për identifikimin e personave të maskuar dhe deanonimizimin e profileve anonime në rrjetet sociale që nxisin dhunë.

Kufizimi i rrjeteve sociale:

Shqyrtimi i mundësisë për ndalimin e përdorimit të rrjeteve sociale për fëmijët nën moshën 16 vjeç.