KAMËZ — Është zbardhur dëshmia para hetuesve e autorit të ngjarjes së rëndë në Kamëz, Ngushëllim Manzi, i cili një ditë më parë vrau me armë zjarri dy vëllezër dhe plagosi rëndë një të tretë.

Ngjarja ndodhi në rrugën “Petrela”, pranë repartit ushtarak të Zall Herrit, ku një konflikt pronësie mes fqinjëve rreth punimeve për një mur rrethues degradoi me përdorimin e armës së shërbimit nga 40-vjeçari Manzi.

Në dëshminë e tij para grupit hetimor, autori ka deklaruar se debati nisi për shkak të manovrave të një betoniereje përpara shtëpisë së tij:

“Vëllezërit Islamaj po kryenin punime dhe betoniera vinte para shtëpisë tonë. Ne i kërkuam ta kalonin te një rrugë alternative se duhet të bënte shumë manovra. Ata na u kthyen keq. Shefqet Islamaj kishte shtyrë dhe goditur prindërit e mi. Kur e mora vesh këtë u nxeha dhe e godita. Pastaj erdhën dy vëllezërit e tij, Selam Islamaj dhe Nazmi Islamaj. Sherri degradoi dhe unë i qëllova me pistoletë.”

Nga të shtënat ndërroi jetë në vend 30-vjeçari Selam Islamaj, ndërsa vëllai i tij më i madh, 48-vjeçari Nazmi Islamaj, ndërroi jetë rrugës për në spital nga hemorragjia. Vëllai tjetër, 44-vjeçari Shefqet Islamaj, ndodhet në gjendje kritike në Spitalin e Traumës me një plumb në gjoks.