KIEV — Sulmet ushtarake ruse kanë shkaktuar sërish viktima dhe dëme të mëdha materiale në rajonet e Kievit dhe Harkivit në Ukrainë, ku katër persona kanë humbur jetën dhe 11 të tjerë kanë mbetur të plagosur nga zjarret e rëna pas goditjeve.

Sipas njoftimit zyrtar nga Shërbimi Shtetëror i Emergjencave të Ukrainës, forcat ruse goditën me artileri e raketa një ndërtesë prodhimi dhe magazinimi në distriktin e Obukhivit në rajonin e Kievit. Sulmi shkaktoi një zjarr masiv, i cili u shua pas ndërhyrjes së zjarrfikësve, ndërsa nga rrënojat u nxorën tre trupa pa jetë dhe gjashtë të lënduar. Ndërkohë, në rajonin verilindor të Harkivit, pesë persona të tjerë u plagosën gjatë një sulmi me dronë në qytetin e Iziumit.

Nga ana tjetër, Ministria e Mbrojtjes e Rusisë konfirmoi kryerjen e sulmeve, duke deklaruar se objektivi i forcave të saj ishte infrastruktura logjistike dhe portuale e Ukrainës.

Sipas palës ruse, goditjet shënjestruan anije mallrash që përdoreshin për transportimin e furnizimeve ushtarake, si dhe qendra të rëndësishme logjistike e transporti në Khmelnytskyi, Kovel, si dhe në portin e Reni-t në rajonin e Odesës.