SHBA, 20 Tetor 2026 — Modelja dhe stilistja e njohur Sahara Ray ka ndërruar jetë në moshën 34-vjeçare në spital, e rrethuar nga familjarët e saj, sipas një deklarate zyrtare të lëshuar nga familja.

Shkaku i vdekjes së saj nuk është bërë ende i ditur zyrtarisht. Megjithatë, Page Six raportoi se ajo vdiq nga një mbidozë fentanili.

Modelja australiane mori mbidozë të opioidit sintetik të premten dhe u dërgua me urgjencë në një spital të Los Angelesit ku u vu në aparatura për mbështetjen e jetës, raportoi Daily Mail.

Familja e saj mori të dielën vendimin për ta hequr nga aparaturat që e mbështesin në jetë, tha një burim i brendshëm për median.

E bija e legjendës australiane të sërfit Tony Ray, ajo fitoi vëmendje ndërkombëtare për karrierën e saj në modeling dhe lidhjen me këngëtarin Justin Bieber.

Modelja e kaloi pjesën më të madhe të fëmijërisë së saj duke udhëtuar midis Australisë, Kalifornisë dhe Hawaiit.

Në vitin 2024, Sahara foli hapur për betejën e saj me sindromën Guillain-Barré — një çrregullim i rrallë neurologjik që e la pjesërisht të paralizuar pas një aksidenti të rëndë me makinë.

Ray ishte gjithashtu sipërmarrëse, duke drejtuar markën e saj të rrobave të banjës “Sahara Ray Swim” dhe duke grumbulluar afër 900 mijë ndjekës në rrjetet sociale.

Ndarja nga jeta e modeles vjen vetëm pak muaj pasi ajo u bë nënë për herë të parë, pasi në janar të këtij viti njoftoi lindjen e vajzës së saj, Snow.