TIRANË — Shqipëria është përfshirë në një raport të Departamentit Amerikan të Shtetit për sigurinë e infrastrukturës dixhitale në vendet në zhvillim, ku Uashingtoni vlerëson përparimin e bërë nga autoritetet shqiptare pas sulmit kibernetik të vitit 2022, të mbështetur nga Irani.

Në dokumentin e paraqitur në Kongresin amerikan, Departamenti i Shtetit bën me dije se SHBA i u përgjigj goditjes dixhitale ndaj Shqipërisë me një paketë ndihme shumëvjeçare prej 25 milionë dollarësh. Konsultimet dhe trajnimet e nisura në fillim të vitit 2023 ndihmuan qeverinë shqiptare të përcaktonte objektivat strategjikë, duke çuar në prill të vitit 2024 në miratimin e ligjit për sigurinë kibernetike dhe ngritjen e agjencisë kombëtare përkatëse.

Dokumenti evidenton ngritjen e dy struktura të rëndësishme operacionale: një Qendre Operacionale të Sigurisë (SOC) për mbrojtjen e rrjeteve qeveritare dhe një qendre kombëtare për mbrojtjen e rrjeteve të infrastrukturës kritike. Këto njësi shërbejnë si partnerë për paralajmërimin e hershëm dhe rrisin aftësinë për identifikimin e kërcënimeve që lidhen me Iranin.

Raporti ndalet gjithashtu te dy incidente konkrete ku ndihma amerikane dha rezultate: një sulm kibernetik në tetor të vitit 2024 që preku një spital të madh dhe një sulm tjetër në qershor të vitit 2025 ndaj rrjeteve të Bashkisë së Tiranës. Departamenti i Shtetit vlerëson se qeveria shqiptare reagoi shpejt dhe në mënyrë efektive për të kufizuar dëmet. Megjithatë, dokumenti nuk specifikon emrin e spitalit e as nuk paraqet vlerësime financiare të dëmit, duke mos e konfirmuar drejtpërdrejt origjinën iraniane për këto dy raste të fundit.

Gjithashtu, Shqipëria është anëtarësuar në FIRST (Forumi i Ekipeve të Reagimit ndaj Incidenteve të Sigurisë dhe Kompjuterëve), një rrjet ndërkombëtar që lehtëson bashkëpunimin për kërcënimet kibernetike. Pavarësisht vlerësimit pozitiv, Departamenti Amerikan i Shtetit nënvizon se Shqipëria ka ende nevojë për mbështetje të mëtejshme për të zhvilluar kapacitetet e saj mbrojtëse në kuadër të strategjisë globale për sigurinë e infrastrukturës dixhitale.