NOTTINGHAM — Katër persona janë vënë në pranga nga autoritetet britanike pasi një oficer policie u plagos me armë zjarri gjatë kryerjes së detyrës në qytetin e Nottingham-it. Ngjarja e rëndë ka alarmuar forcat e rendit, ndërsa hetimet po vijojnë për zbardhjen e plotë të motiveve dhe rrethanave të këtij sulmi ndaj efektivit të policisë.

Sipas njoftimit zyrtar të Policisë së Nottinghamshire, incidenti ka ndodhur në orët e para të mëngjesit të së dielës në rrugën “Angel Row”. Oficeri i policisë u është afruar dy personave të dyshimtë për të kryer një verifikim rutine, por në atë moment të dyshuarit kanë hapur menjëherë zjarr ndaj tij. Efektivi i lënduar u transportua me urgjencë në spital, ku ndodhet nën kujdesin e mjekëve në gjendje të stabilizuar shëndetësore.

Pas ngjarjes, shërbimet e sigurisë ndërmorën një operacion të gjerë kërkimi në disa zona. Gjatë mbrëmjes të së dielës, policia ndaloi një automjet në zonën Redford të Nottingham-it, ku arrestoi tre persona: dy gra të moshës 25 dhe 27 vjeç, si dhe një 24-vjeçar. Operacioni u pasua me prangosjen e personit të katërt, një 30-vjeçar i kapur në Bedfordshire në orët e para të mëngjesit të së hënës. Grupi hetimor po vijon punën për dokumentimin e plotë të veprimtarisë së të arrestuarve.