TIRANË — Ministria e Shëndetësisë ka publikuar një përditësim të ri lidhur me numrin e personave që kanë marrë ndihmë mjekësore në spitalet e kryeqytetit si pasojë e përplasjeve gjatë protestave.

Sipas të dhënave zyrtare, përgjatë ditës së djeshme në Spitalin Universitar të Traumës (SUT) kanë marrë shërbim mjekësor urgjence gjithsej 31 persona të lënduar:

21 efektivë të Policisë së Shtetit;

5 protestues (2 prej të cilëve po kryejnë ekzaminime dhe konsulta të mëtejshme);

4 qytetarë kalimtarë;

1 përfaqësuese e medias, e cila vijon të jetë e shtruar.

Nga data 13 tetor e deri më tani, numri i përgjithshëm i personave që vijojnë të marrin mjekim spitalor në SUT mbetet 14, ku përfshihen 5 efektivë policie, 4 protestues, 4 kalimtarë dhe 1 gazetare, gjendja e të cilëve paraqitet e mirë.

Gjithashtu, pranë Qendrës Spitalore Universitare “Nënë Tereza” (QSUT) janë paraqitur gjatë ditës së djeshme 5 persona të lënduar, prej të cilëve 2 efektivë policie dhe 3 protestues.