LAÇ — Policia e Kurbinit ka finalizuar operacionin e koduar “Blindi”, duke vënë në pranga dy persona gjatë një kontrolli të papritur në qytetin e Laçit. Në pranga kanë rënë shtetasit E. P., 35 vjeç, dhe Z. K., 31 vjeç, të dy banues në Laç.

Forcat e rendit ndaluan automjetin luksoz të blinduar të llojit “BMW” me të cilin udhëtonin dy të rinjtë, i cili drejtohej nga 35-vjeçari E. P.

Nga verifikimet e kryera në sistem prokurorie, rezultoi se drejtuesi i mjetit kishte thyer masën e sigurisë “Arrest në shtëpi”, të caktuar nga Gjykata e Apelit Tiranë për veprën penale “Prodhimi dhe shitja e narkotikëve”.

Gjatë kontrolleve fizike dhe në banesë, policia sekuestroi provat materiale:

Lëndë narkotike: Një sasi e llojit Cannabis Sativa u gjet gjatë kontrollit fizik të pasagjerit Z. K.;

Sendet e sekuestruara në banesë: Një jelek antiplumb dhe një armë e ftohtë (shpatë);

Aksesorë të tjerë: Tre telefonë celularë, si dhe automjeti i blinduar tip “BMW”, i cili dyshohet se është përfituar nga burime të paligjshme financiare.

Materialet procedurale i kaluan prokurorisë për veprime të mëtejshme hetimore mbi veprimtarinë e të dy shtetasve.