TIRANË — Kryetari i Delegacionit të Parlamentit Evropian për marrëdhëniet me Shqipërinë, Marco Tarquinio, dhe raportuesi i përhershëm për Shqipërinë, Andreas Schieder, kanë reaguar përmes një deklarate të përbashkët duke shprehur shqetësim të thellë për përshkallëzimin e protestave në Tiranë.

Përfaqësuesit e lartë të Parlamentit Evropian dënuan aktet e dhunës, sulmet ndaj institucioneve publike dhe shkatërrimin e pronës, ndërsa kërkuan gjithashtu hetimin e pretendimeve për përdorim të tepruar të forcës nga ana e trupave policore.

Në deklaratën e tyre zyrtare, eurodeputetët theksuan se respektimi i sundimit të ligjit mbetet kushti kryesor për rrugëtimin e Shqipërisë drejt anëtarësimit në Bashkimin Evropian.

Lidhur me situatën e tensionuar në kryeqytet, Marco Tarquinio dhe Andreas Schieder deklaruan:

"Në emër të Delegacionit të Parlamentit Evropian për marrëdhëniet me Shqipërinë dhe si raportues i përhershëm i Parlamentit Evropian për Shqipërinë, shprehim shqetësimin tonë të thellë për ngjarjet e fundit që kanë ndodhur në vend, dhe në veçanti në Tiranë. Ne dënojmë përshkallëzimin e dhunshëm të këtyre protestave, sulmet ndaj institucioneve publike dhe shkatërrimin e pronës publike dhe private. U bëjmë thirrje protestuesve të ushtrojnë vetëpërmbajtje maksimale dhe të përmbahen nga çdo akt dhune, pasi ato nuk kontribuojnë në një zgjidhje dhe nuk kanë vend në demokraci."

Reagimi i zyrtarëve të BE-së vjen në ditën e shtatë të protestave masive në vend, ndërsa vëmendja e partnerëve ndërkombëtarë është përqendruar te ruajtja e stabilitetit dhe respektimi i normave demokratike.