TIRANË — Kryeministri Edi Rama ka paralajmëruar masa drastike ndëshkuese edhe ndaj arsimtarëve që, sipas tij, nxisin nxënësit të marrin pjesë në acte dhune apo të dëmtojnë godinat e institucioneve arsimore.

Duke iu referuar veçanërisht një incidenti të pretenduar në qytetin e Lezhës, kreu i ekzekutivit deklaroi se çdo mësues i përfshirë në nxitjen e trazirave do të përjashtohet përgjithmonë nga sistemi arsimor dhe nga administrata publike.

Lidhur me qëndrimin e qeverisë ndaj arsimtarëve të përfshirë në protestë, Edi Rama deklaroi:

"Mësues, mësues që marrin nxënësit dhe i nxjerrin nga shkolla dhe u thonë: ‘Bini xhamave të shkollës’, siç ndodhi në Lezhë. Ajo mësuese dhe ata mësues nuk kanë për ta parë më derën e shkollës dhe nuk do të marrin më asnjë lloj roli si punonjës të shtetit, kurrë më në shtet. Si mundet një mësues t’i thotë nxënësit të thyejë xhamin e shkollës? Çfarë është kjo lëvizje për ta bërë Shqipërinë më të mirë, më europiane, më demokratike, më njerëzore?"

Deklarata e kryeministrit vjen në një kohë kur bojkoti i mësimit dhe marshimet e gjimnazistëve po zgjerohen në disa prej qyteteve kryesore të vendit.