LEZHË — Vala e protestave rinore është shtrirë sërish edhe në qytetin e Lezhës gjatë ditës së sotme, ku një grup i konsiderueshëm nxënësish dhe të rinjsh kanë bojkotuar procesin mësimor për t’iu bashkuar revoltës.

Të rinjtë kanë nisur marshimin e tyre nëpër rrugët kryesore të qytetit, duke lëshuar thirrje të njëpasnjëshme kundër kreut të ekzekutivit: “Rama, jep dorëheqjen!”.

Në terren janë vendosur menjëherë forca të shumta të Policisë së Shtetit, të cilat po monitorojnë nga afër lëvizjen e manifestuesve.

Për shkak të tensioneve dhe situatës së krijuar nga bojkoti masiv, shumë nxënës të tjerë kanë zgjedhur të mos paraqiten në auditore e banka shkollore, duke qëndruar në shtëpi.

Bojkoti i mësimit dhe marshimet e të rinjve në Lezhë po vijojnë kështu edhe këtë javë, duke reflektuar frymën e protestave që ka përfshirë disa nga qytetet kryesore të vendit.

Në Shkodër, në këto momente të rinjtë janë ndalur përpara Bashkisë Shkodër, ku u kanë kërkuar efektivëve të heqin kapelat dhe t’u bashkohen në marshimin e tyre.