TIRANË — Kryeministri Edi Rama ka njoftuar një paketë financiare mbështetëse për efektivët e Policisë së Shtetit të angazhuar në përballjen me protestat e ditëve të fundit, si dhe një rritje të konsiderueshme të pagave të tyre që do të hyjë në fuqi nga fillimi i vitit të ardhshëm.

Gjatë fjalës së tij përpara trupave të policisë, kreu i qeverisë bëri me dije se përveç rritjes me buxhetin e ri nga 1 janari, është vendosur edhe alokimi i një shpërblimi të menjëhershëm financiar prej 2,500 eurosh për çdo efektiv që ndodhet në vijën e parë të përballjes me manifestimet.

Lidhur me mbështetjen financiare dhe qëndrimin e qeverisë ndaj trupave të rendit, Edi Rama deklaroi:

"Ne do ta rrisim në mënyrë të konsiderueshme pagën tuaj. Kur policinë e gjetëm të tradhtuar dhe të braktisur, bëmë rritje të konsiderueshme atëherë. Në vite, nuk e kemi rritur aq sa duhet pagën tuaj. Po bisedonim përpara disa javësh. Me buxhetin e ri, nga 1 janari, paga juaj do të rritet në mënyrë të konsiderueshme. Ne do vëmë në dispozicion një shumë prej 2500 eurosh, për çdo efektiv në front. E vendosëm kështu, për të mos bërë asnjë diferencë. Jeni një, dhe një për të gjithë. Shteti do ta fitojë këtë betejë."

Deklarata e kryeministrit vjen mes kritikave të shumta nga shoqëria civile dhe opozita mbi përdorimin e forcës, gazit lotsjellës dhe plumbave të gomës nga policia gjatë përplasjeve me protestuesit.